Баткендик аялдар жолду өздөрү оңдоп жатышат
Баткен облусунун жашоочулары кары-жашы дебей жолдорду өздөрү оңдой башташты.
Совет айыл өкмөтү менен Кадамжай районунун борборун бириктирүүчү жолдун бузулганына көп жыл өткөнүн айтышат айыл эли.
"Ар бир президенттик же парламенттик шайлоодо келген талапкерлер жолдун тарпы чыкканын көрүп, сөзсүз оңдоп беребиз" деп убада беришет дейт. Бирок канча жолу шайлоо өттү, жолдун бир метр жери да оңдолбогонуна нааразы болгон эл кары-жашы, кыз-келиндери, аялдары бардыгы жапа-тырмак жол оңдоого киришти.
“Шайлоо учурунда келген талапкерлер, шайлоо бүтөөрү менен бизге берген убадасын унутушат. Эми шайлоого жакындап калды, баягы эле көнүмүш убадалар башталды, биз эч кимге ишенбей калдык”, - дейт нааразы болгон айыл жашоочулары.
Өкмөттөн үмүт үзгөн эл жолго кум чачып, өздөрү түздөп, оңдоп жаткан аялдардын сүрөттөрүн жарыялашты.
