Шаар чарчап, уктап жатат шалдырап...

30-июнь, 16:51

1 397 ᠌ ᠌ ᠌ ᠌᠌ ᠌ ᠌᠌

Дарт катуу күчөгөндүктөн белгилүү акындар бул күндөр тууралуу ыр жаза башташты. Төмөндөгү ырды белгилүү акын Майрамбек Токторов жазган.

Ооруган шаар

Шаар чарчап, уктап жатат шалдырап,

Укта шаарым, уйкуң бузбай турайын.

Дене табың көтөрүлгөн кечээ эле,

Абалыңды “тез жардамдан” сурайын.

Жөтөлүң бар, өңүң купкуу көрүнөт,

Ага болбой муздак жамгыр төгүлөт.

Чыйрыгыпсың, дары издейсиң буйткадан,

Бутуң муздак. Жыт билбейсиң бөжүрөп.

Шапар тепкен, чарк айланган күн кана?

Томсоруптур топук кылбас тойкана!

Шарактаган бириң жоксуң мындайда,

Шаар ыйлап шапаюуда тим гана.

Сакай шаарым, дартың узак болбосун,

Сени Кудай жамандардан коргосун.

Дартка ишенбес пендең сени оорутту,

Сени ооруткан “дардаңбайлар” оңбосун!