Вирустун айынан Кыргызстанга “Жүк 200” жөнөтүлбөй калды
Москвада өрттө каза болгон кыргызстандыктын сөөгү ошол жакта жерге берилет. Кыргызстандын Орусиядагы элчилиги кабарлагандай, жумуш берүүчү тарап баардык чыгымды өзү каржылап, жакындарына компенсация төлөп бермей болду.
Элчиликтин маалыматына караганда, кырсык 5-апрелге караган түнү Москвада курулуш жүрүп жаткан жерде болгон. Жумушчулар жашаган чатырдын ичинде меш бузулуп, кыргызстандык жаран иске ууланган. Кыргызстан мусулмандар башкармалыгынын кайрымдуулук фондунун Москвадагы бөлүгү менен иштешкен жарандык активист Бекназар Турдакуновго кайрылганыбызда, ал төмөндөгүлөргө токтолду. “Кыргызстанга “Жүк 200” жөнөтүлбөй жатат. Жакында эле бир мекендешибизди "Балашиха" деген жердеги мусульмандардын жайына биздин фонддогу жигиттер туугандары менен биргеликте коюп келди. Майга чейин рейс жок дегенине байланыштуу ушул жакта коюлуп жатат. Коронавируска байланыштуу эки мекендешибиздин сөөгүн Москвада жерге бердик” деп билдирген.
