Абдыкадыров 1,5 миллион сом жардам кылып, элге жакын экенин көрсөттү
Жеке ишкер, Бишкек шаарындагы "Жаңы доор" деген аталыштагы заманбап шаарчаны куруп жаткан "Нур строй монтаж" курулуш компаниясынын жетекчиси Эмилбек Абдыкадыров элибиздин башына келген оор сыноодо кыргызстандыктар үчүн өзүнүн эсебинен жалпы 1,5 миллион сом жардам көрсөттү. Белгилей кетсек, өлкөдөгү эпидемологиялык иштерге байланыштуу, атайын ачылган министрликтин эсебине калктын саламаттыгы үчүн 1 миллион сом которуп берген. Мындан тышкары, кыйынчылык тартып жатышкан Ленин районундагы аз камсыз болгон 50 үй-бүлөгө тамак-аш жагынан да жардамын көрсөткөн. Курулуш тармагында иштеп, абалга байланыштуу үйүндө олтурган 100 жумушчуга 300 миң сом бергенин угуп, “элибизде ушундай уулдарыбыз көп болсо” деген тилекти айткыбыз келүүдө. Акыркы маалыматтарга караганда, атайын ачылган эсепке которулган акча 100 миллион сомго жеткен. Көпчүлүгү жеке ишкерлер экени маалым болууда. "Эл дегенде эт-бетимен кетем" деген "багарман" депутаттардын кайрымдуулук кылганы аз экени, албетте, калкка эми кимдер кам көрөрүнөн кабар бергенсип турат. Бириксек, баарын жеңебиз!