Токтосун Самудинов: Чырылдаган чындыктар...

21-июнь, 12:00

324 ᠌ ᠌ ᠌ ᠌᠌ ᠌ ᠌᠌

Аталбаска “Лопух!” деп,

Чоңдор башын маң кылат.

Иликтелип диплом,

Жиликтелет кандидат.

Кудай да укпай арызын,

Мандатынан айрылат.

***

Заводдорду жайнаган

Келет биздин көргүбүз.

Токтонасыр баласы

Жалгыз гана – Өндүрүш.

***

Москвада Акаев

Жаңы ысымга конуптур.

Гастарбайтер аталбай,

АСКАРбайтер болуптур.

***

Тамакты “халал”, “харам” деп

Молдолор ураан таштады.

Макулбуз буга, а неге

Унуттук “харам акчаны”?

***

Өкүн, мейли өкүнбө!

Өмүрүңө кеч кирет.

Төрөлүүнүн өзүндө

“Өлүү” деген сөз жүрөт.

***

Көлөч бир күн жашыды

Көптөн берки арманы:

Төргө өткөрүп маасыны,

Өзү сыртта калганы. 

"Азия Ньюс" гезити