Сомнолог күзүндө уйкуну жакшыртуунун жолдорун атады
Күз мезгилинде күндүн кыскарышы уйку режимине таасирин тийгизип, адамдын эртең менен ойгонушун кыйындатышы мүмкүн. Дарыгер-сомнолог, медицина илимдеринин доктору, профессор Роман Бузунов күзүндө уйкуну жакшыртуу жана организмдин күн тартибин сактоо боюнча кеңештерин берди.
Адистин айтымында, күзүндө уйкунун бузулушу сезондук аффективдүү бузулуу, башкача айтканда, сезондук депрессия менен байланыштуу болушу мүмкүн. Күздүн аяк ченинде күндүн кыскарышы адамдын циркаддык ритмдерине таасир этет. Күндүн жарыгынын азайышы мээнин күн менен түндүн алмашуусун туура аныктоосуна тоскоолдук жаратышы мүмкүн.
Мындан тышкары, организмдеги D витамининин жетишсиздиги да маанайга терс таасирин тийгизиши ыктымал.
Уйкуну жакшыртуу үчүн эмне кылуу керек?
Роман Бузунов сезондук уйку көйгөйлөрү менен күрөшүүдө жарык терапиясын колдонууну сунуштады. Анын айтымында, адам ойгонгондон кийин күндүн нурун туураган атайын жарык берүүчү аппараттарды же жарык көз айнектерди колдонсо болот. Алар организмдин күндүзгү режимге ыңгайлашуусуна жардам берет.
Сомнолог уйкунун гигиенасына да өзгөчө көңүл буруу керектигин белгиледи. Анын сунуштары төмөнкүлөр:
Уктоочу бөлмө салкын жана караңгы болушу керек.
Бөлмөдөгү нымдуулукту 50–60 пайыз деңгээлинде кармоо сунушталат.
Ыңгайлуу керебет, матрас жана жаздык тандоо зарыл.
Бөлмөдө чаңдын топтолушуна жол бербөө керек.
Аллергия жаратуучу факторлор аз болгон шарт түзүү маанилүү.
