“Кызга бергис жубан бар” демекчи, балалуу келин менен бактылуу жашап кеттим
Мындан беш жыл мурун бир кыз менен сүйлөшүп калдым. Жакшынакай, арыкчырай, уялчаак кыз эле. Бир күнү “үйлөнөлү” десем, “жок” деп эле болбой койду. Себебин айтпай кетип калды. Кийин мага СМС жазды: «Менин эки балам бар, кечир» дептир. Ишенбей, кызыктай эле болуп отуруп калдым. Эртеси жумушуна барып күтүп отуруп, чыкканда машинага салып алып сүйлөшсөм, баарын айтып берди. Күйөөсү экинчи баласы боюнда барда каза болуп калыптыр. Ойлонбой эле “үйлөнөм” дедим, себеби, аны жоготкум келбеди.
Баарына көзүмдү жумуп, үйлөнүп алдым. Ата-энем башында нааразы болушту. Бирок Гүлзина жакшы келин болуп чыкты. Катары менен эки уул төрөп берди. Азыр бактылуу үй-бүлөбүз. “Кызга бергис жубан бар” деген кеп бекер жеринен айтылбаса керек деп, кээде макалдарга маани берип калчу болдум.
