Райым Матраимовго каршы митингге чыгуу негизсиз. Себептери бар...
Буга чейинки жарыяланган “Азаттыктын” иликтөөлөрүн УКМК териштирүүдө. Райым Матраимовду эки ирет күбө катары суракка чакырды. Ал өзү да интервью берип, айтылып аткан дооматтар жалган жалаа экенин түшүндүргөн. Бул боюнча сотко да берди. “Азаттык”, “Клооп”, “24.kg” сайттарынын эсептери камактан чыкты. Негизинен алганда, демократиялык принциптер бузулган жок.
Натыйжада, УКМКнын иликтөөсүн, Райым Матраимовдун доо арызынын негизиндеги соттошууну күтүш керек. “Сабырдын түбү сары алтын” дегендей, баардык жагдайдан саресеп салууга убакыт бар, коомчулук астында чындык кайсы тарапта экенине жетүүгө шарт түзүлдү. Анан болбой эле ураалап митингге чыгуунун артында саясый оюндар болууда. Чыныгы коррупцияга айыпталгандар ТЭЦтин кыйрашы, андан солонгон миллиондордун негизинде соттолушту. Башка да козголгон чоң иштердин алкагында тергөөлөр жүрүүдө, бир топ адамдар түрмөдө отурушат. Мына ушул өңүтүнөн карасак, бийликке өчөшкөн тарапташтар, бир жагынан Батыштын “ийри идеологиясынын” атакасы менен кылдан кыйкым издегендер, бейөкмөтчүлөр, трайбалисттик оорудан арылбагандар жаалашып, Райым Матраимовду бутага алышып, далилденбеген коррупциялык жарлыктарды тагышып, жалпы элдин көзүн будамайлоого басым жасашууда. “Чапкан жерден эле көз чыкпайт” дейт. Өткөн митингде да “Реакция” ураанын көтөрүп чыга калышканы ачык эле сырткы душмандардын буйрутмасы, чоң кармашка даярдык көрүү ыкмасындай байкалды го? Ириде, элибиз ар кандай тескери күчтөрдүн куралы болуп калбашы зарыл. “Бөйрөктөн шыйрак чыгарууга”, будамайлоого көпчүлүк жетеленип, алданып кала турган мезгилдер өткөн...
Акыл токтотуп, аңдап көрсөк, Райым Матраимовдун популярдуулугуна тескери реакция жаратышып, провокация кылуу менен саясый мүдөөлөрүн ишке ашырууга, бузукулук жаратууга жандалбастоо жакшылыкка алпарбайт. Райым Матраимовдун да укугу бар, тебеленбеши шарт! Буга дейре канчалаган каралоолорго чыдап келди, эми иш жүзүндө баардык соккуларды сот аркылуу териштирип алсын да. Көчөгө чыгуу аркылуу башаламандык жасоого ниеттенгендер катуу жазаланып калышы ыктымал...
Aryba.kg
