Икрамжан Илмияновдун оор кылмыштарга айыпталышына негиздер бар
Парламентте депутат Медер Алиев президенттик аппараттын мурдагы орун басары Икрамжан Илмияновдун кылмыштуу аракеттерине токтолуп, коомчулук астында жазалоонун жумшак мааниде сунуш кылды. Көпчүлүккө жага турган кеп экени талашсыз. Алмазбек Атамбаев бийликке келгиче шопур кембагал кейиптен кичине эле жогорку деңгээлде жүрчү. Анан көрүп алгыла, жети жылдын ичинде өлкөдөгү эң бай адамдардын катарына кошулуп, манчыркап калды. Саясый, мамлекеттик иштерди чечип, катуу доор сүргөн. Кантип олгархка айланганы иликтенбесе деле байкалып турбайбы. Ириде “Мыйзамсыз баюу”, “Коррупция” беренелери менен иш козгоп, камаса болбойбу? “Алып-жулганын” мамлекетке төксүн да! Айтмакчы, Сооронбай Жээнбеков бийликке келгенде Икрамжан Илмияновду эл көзүнө жазаламыш этип, “Алдамчылык” боюнча гана айыптап, түрмөгө кесип, кайра тез эле чыгарып, чоң жоопкерчиликтен кутултуп жибергенин билесиңер да. А учурда заман башка, кийинки чиновниктерге сабак, тарбия болушу үчүн Илмиянов жазасын катуу алса, эски ыплас жоруктар, “өзүн өзү билип, өтүгүн төргө илген” кесепеттер кайталанбайт эле. Өтмүштү оңдоп алмайын, келечекке кантип дүрбү салабыз?..
"Азия Ньюс" гезити
