Азамат Жумабаев 35 кг алтынды ИИМге алдырып, изин суутканбы?
Оштогу оперлер арасында чуулгандуу окуянын башаты тар чөйрөдө талкууланып, “долябызды албай калдык” деген кеп тарай баштады. “Азия Ньюс” гезитине тымызын маалымат беришип, өз ара кайнап жатышат. Эмесе, биз учугун улай ИИМдин тергөө башкармалыгынын начальниги Азамат Жумабаевге суроолорду жолдойлу. Жогорку тийешелүү жетекчиликтер баа беришсин.
Өткөн 24-июлда Дубай-Ош каттамынын самолёту конуп, андан 35 кг алтын кармалганбы? ИИМдин түштүк аймагы боюнча уюшкан кылмыштуулукка каршы башкармалыгынын кызматкерлери иштешип, ири контрабанда колго түшүрүлсө, аны эмнеге жаап-жашырышты? Азамат Жумабаев атайын бөлүктүн машинесин жөнөтүп, 35 кг алтынды ИИМге алдырып, изин суутканбы? Колго түшкөн бажычылар менен “жең ичинен” чечиштиңерби? Мындай чоң көлөмдөгү алтын кармалганда ачык маалымат берилип, мамлекетке алыш керек да, туурабы? Сатыктагы баасы 2 миллион долларга жакындайбы? Ошондо парасын очойто алып туруп, көмүскөдөн “ымдашып” бүтүрдүңөрбү?..
Жакында УКМК төрагасы Камчыбек Ташиев мамлекеттин кызыкчылыгы үчүн иштөөдө тууган, дос жок экенин айтты. Мыйзамсыздык болсо, баарын жазалай турганына ишендирди. Мындай шартта жогорудагы биздин суроолорго реакция кылып, ИИМдин тергөө башкармалыгынын начальниги Азамат Жумабаевдин шектүү ишине кызыгып көрөбү?
