“Куспаган” Конушбаев калдыбы?..
Төрт жылдан ашык убакыттан бери “кустуруу” мамлекеттик деңгээлдеги саясатка айланганы жашыруун эмес. Жеп-ичкич чиновниктер, шектүү ишкерлер, дээрлик күркүлдөр, айтор, элдин эсебинен байыгандар тергөөгө алынышып, камалышып, коррупцияга каршы айыгышкан күрөштүн капшабында калып келишет. Алардын ичинен салык жашыргандары канча?
Айтмакчы, ири байлардын ичинен “куспаганы” эле Тынчтыкбек Конушбаев айтылууда. Отуз жылдай убакыттан бери ишкерлик менен алектенип келаткан бул адамдын “калбыры” жокпу? “Байтур” ден соолукту чыңдоочу борборун өркүндөтүп, Ысык-Көлдө коттедждер шаарчасын куруп, убагында Татырдан, Суусамырдан алган гектарлаган жерлери, айтор, кулач жайган байлыгын санай берсе арбын. Таза иштейби? Илгери кымбат баалуу объектилерди, жерлерди кандай жол менен менчиктештирди болду экен? Коомчулук күмөн санабаш үчүн отчёт берип койсо да ашыктык кылбас эле. Буга чейин Тынчтыкбек Конушбаевдин УКМКга чакырылганын уккан эмеспиз. Эгерде кынтыксыз, жипке тизген шурудай ырааттуулукта эмгектенсе, анда кеп башка! “Баракелде!” дейбиз.
"Азия Ньюс" гезити
