Кой-Таш чыңалган жатса, бийлик дардаңбайлары оюн-зооктун үстүндө жүрүшөт...
Өткөн айларда Аламүдүн районунун Байтик айылында Чүйдүн ондогон командасын топтошуп, улак тартыш өткөрүшкөн. Келгендер оюн көрүшүп, алган байгелерин жуушуп, бапырап тарап кетишкен болчу. Тилекке каршы, элге карата үгүт-насаат кептери айтылбай, ынтымак идеологиясына баш оорутушпаганы таңгалдырган!
Эми болсо 7-8-февраль күндөрү Сокулук районунун Белек айылынан кайрадан көк бөрү тартышып, Чүй облусунун биринчилигин майрамдаганы жатышыптыр. Демилгечилер шайлоо астында пиар иштерин жүргүзүп алуу үчүн эдиреңдешип, эл астында жеке упай топтоого шымаланганын уктук. Азыр улам бир партияга секирип, мандат куугандардын заманы болуп калбадыбы!
Биз кеңеш айтат элек, чүйлүк мансапкорлор шайлоого карай жеңил пиары үчүн жандалбаска түшө беришпей, Сары Өзөндөгү ынтымакты чыңдоого, элдин келечекке болгон ишенимин арттырууга, ошого катар сабырдуулукка чакыруу демилгесин көтөрүшпөйбү?! “Чайнап берген аш болбойт” дегендей, буларга миң кайталап жазсаң деле мээлерине кирбей, жеке кызыкчылыктары үчүн аттарын чыгарууга эле кызыгышат тура. Ал эми мамлекеттин туруктуулугу үчүн эмнеге ойлонушпайт? Маселен, жазында Кой-Таш окуясын ырбатууга аракеттер көрүлүп атканын билесиңерби? Бул жагынан тымызын күчтөр "иштеп" атышса, депутаттыкка аттанган бийликтин дардаңбайлары оюн-зооктун үстүндө жүрүшөт...
Aryba.kg