Кыргызстанга 223 мектеп курулуп бүткөндө гана өнүгүү боюнча оозансаңар жарашат
Министр Догдуркүл Кендирбаев республика боюнча 223 мектеп жетпей турганын айтты. Албетте, бул чоң көйгөй. Баарыбызга белгилүү болгондой, көпчүлүк жерлерде бир класста 40-50дөн балдар окуп жатышканы маалым. Мындай шартта кайдагы билим берүү? Эң кызыгы, өлкөнүн өнүгүүсүнө карата бийлик баканооздору менен парщиктери ар кандай көрүнүштөрдү айтып келишет. Көп кабаттуу үйлөрдүн курулушун, жолдордун салынышын ж.б. Булар өсүүнүн көрсөткүчү эмес. Ириде береги 223 мектеп курулуп бүтсө, билим берүүгө чыныгы шарт түзүлсө, мына ошондо Кыргызстандын өнүгүү жолуна түшкөнүн тартынбай айтсак жарашат. Натыйжада, бул маселе качан ишке ашат? Он же жыйырма жылдабы? Азырынча пландуу аракеттерди байкай элекпиз. Өкмөт качан гана мектеп көйгөйүн толук кандуу чечкенде, эл асында уялбай шерденип, мактансаңар жарашат.
"Азия Ньюс" гезити
