Бишкекте 12 киши суукка тоңуп өлдү
Республикалык соттук-медициналык экспертизанын директору Данияр Кошоковдун билдиргенине таянсак, акыркы эки күндө Бишкек шаарында сууктан тоңуп өлгөндөрдүн саны 12 адамга жетти.
24-ноярдан 25-ноябрга караган түнү беш киши суукка тоңуп каза болгону аныкталган. Алардын үчөө аял, экөө эркек. Андан бери дагы суукка тоңгон жети адамдын сөөгү табылган, алардын баары үй-жайсыз адамдар.
Бишкек шаарынын мэриясы шаарда суук күчөгөнүнө байланыштуу үй-жайсыз адамдарга убактылуу башкалка берүүчү түйүндөр ачылганын билдирген.
Жибек Жолу № 413 дарегинде «Коломто» борбору. Учурда бул жерде 74 адам бар. Бирок үй-жайы жок, көчөдө жүргөн деп катталып, жашап тургандардын саны 80ден ашат. «Коломтонун» телефону — 30-48-55. Фере көчөсүндөгү №34а үйүндө ушундай дагы бир жай иштөөдө. Анда 51 киши баш калкалап турат. Телефону: 36-03-35. Ошондой эле Токомбаев көчөсүндө жайгашкан «Тазалык» ишканасынын имаратына келип баш калкаласа болот. Телефону: 51-19-38.
Эскерте кетсек, бугүн 27-ноябрдан тарта өлкө аймагында абанын температурасы кескин төмөндөй турганын Өзгөчө кырдаалдар министрлиги эскертти/
