“Ажарлуу аял элдин көркү, акылдуу аял эрдин көркү”
“Өмүр бизден өтүп кетсе, эл эмгектен эскерсин” деп залкар акын Аалы Токомбаев айткандай, бул саам көңүл көтөрчү саамалык болду. ИИМдин жол кыймылынын коопсуздугун камсыздоо башкы башкармалыгы жана облустагы бөлүмдөрү 8-март эл аралык аялдардын майрамына карата жылуу маанай тартуулашты. Аталган мекемеде иштеп, кызмат учурунда каза болгон кызматкерлердин энелерине, жубайларына ИИМдин “Мээримдүү айым” жана “Офицердин жубайы” аттуу төш белгилери менен белектер тартууланды. Ошого катар үй-бүлөлөрүнөн кабар алууга да жетишишти. Бала-чакаларына акыл-насаат айтышып, моралдык жактан колдоо көрсөтүштү. Бул иш-чара республиканын баардык аймактарында өткөрүлдү. Мындан сырткары, ардактуу эс алууга чыккан эжекелерге, о.э. катардагы кызмат өтөп жаткан айымдарга министрликтин жана башкармалыктын төш белгилери жана баалуу белектери тапшырылды. “Ажарлуу аял элдин көркү, акылдуу аял эрдин көркү” дегендей, аялзатынын орду жашоодо бийик экенине ынанып турган чагыбыз.
"Азия Ньюс" гезити
