Тойдон келаткан артисттер кырсыкка кабылып, төртөө каза болду
Кечээ, Балыкчы шаарындагы тойканалардын биринде тойго кызмат көрсөтүп, чыгып келе жатышкан чыгармачыл топ Балыкчы - Кочкор автоунаа жолундагы кырсыкка кабылышты. Арасында каза болгондор бар.
Бир машиненин ичинде бараткан беш киши автокырсыкка кабылып, төртөө көз жумганы айтылууда. Алардын арасында төкмө акын, актёр Акжолтой Канат уулу кырсыктан каза болду. Жүргүнчүлөрдүн бири учурда Кочкордогу ооруканада эсине келе албай жатат. Акжол Канат уулунун жанында жубайы да болгон. Машинени кочкорлук ырчы жигит Жоомарт Алмазбеков айдап бараткан. Кечээ Кочкор районуна кар жаап, кар жолдогу тайгакта машиненин тормозу иштебей, жолдун четине чыгып кеткен.
Акжолтой Канат уулу таанымал төкмө акын маркум Майра Керим кызынын уулу. Ырчы катары бир нече республикалык айтыштарга катышып алдыңкы орундарга ээ болуп, тасмаларга да тартылып, актердук чеберчилигин көрсөтүп жүргөн. Акындын үйлөнгөнүнө эки гана ай болгон. Быйыл ал 26 жашка чыкканы айтылууда.
