Алишер Козуев, ЖК депутаты: “Камчыбек Ташиевдин ачык айтканы элге чоң ишенич берди”
-- Алишер мырза, өткөндө Кара-Суу базарында чыңалуу болуп турду эле, азыр абал кандай?
-- Туура, бир аз чыңалуу болгон, бирок мамлекеттик органдардын кийлигишүүсү, аракети менен азыр абал туруктуу. УКМКнын төрагасы Камчыбек Ташиев ал жакка барып, маселени жеринен көрүп, ачык айтканы элге чоң ишенич берди. Мисалы, мен мурда анчалык деңгээлде билчү эмесмин. Толук маалымат алгандан кийин бийликтин жасап жаткан аракеттеринин тууралыгына ынандым. Бир ууч адамдар базарды ээлеп алып, өздөрү каалагандай баа коюп, бир контейнерин эки-үч жолу саткан учурлар аныкталды. Кээ бир базар жетекчилери камакка алынганы буга далил. Жогорку бийлик өкүлдөрү карапайым калктан кабар алып, “заманбап соода борборлорун курабыз, жыйырма, же жүз чарчы метр жери бар соодагерлерге базардын ичинен шарт түзүп беребиз” дегени сүйүндүрөт. Элдин үмүтү чоң, күтүп атышат.
-- Буга чейин мыйзамсыз ээлеп алынган жерлер да кайра кайтарылса керек?
-- Менде толук маалымат жок болгондуктан, ага укуктук баа бере албайм. Бирок, укук коргоо органдары документтердин түп нускаларын карап чыгып, ошого жараша иш жасашат го.
