Марлен Маматалиев: “Баңгизаттар сатылып, өспүрүмдөр мектептерде атайын клейлерди жытташат...”
-- Марлен мырза, социалдык түйүндөрдө тараган “Принцесса дури” кылмыштуу тобу тууралуу видеосюжет коомчулукту аябай дүрбөлөңгө салып, будуң-чаң түшүрдү десек болот. Бул боюнча сиз эмне айта аласыз?
-- Анын коомчулукка чыгып кеткени бир жагынан жакшы болду. Себеби, көбү билчү эмес, мындай көрүнүш Кыргызстанда болуп жатканы түшкө кирбес нерсе эле. Ошол окуядан кийин бир-эки саат эле изилдөө жүргүзүп көрсөк, тилекке каршы, биздин мектептерде андай топтор көп экен. Конфет түрүндөгү баңгизаттар сатылып, өспүрүмдөр мектептин ажатканаларында электрондук сигареттерди чегишип, атайын клейлерди жытташат экен. Ошондуктан, бул көрүнүш менен күрөшүүгө тийишпиз. Биз ошон үчүн комитетте бул маселени карап, анан жалпы палатанын жыйынына да чыгаралы деп жатабыз. Бул жерде жоопкерчилик маселеси да бар.
-- Бул окуя коомчулукта чоң суроону пайда кылып койду. Эмне үчүн мындайга жол берилди? Эмне себептен, мугалимдер, укук коргоо органдарынын түздөн-түз балдар менен иштеген түзүмдүк бөлүктөрү билишкен эмес?
-- Ошон үчүн мен жогоруда айткандай, жоопкерчиликти сөзсүз карашыбыз керек. Тийешелүү мамлекеттик органдардагы чиновниктер жазаланууга тийиш. Антпесек, мындай көрүнүштөр кайталана берет. Берилген тапшырмалардын негизинде бир топ жыйындар өтөт. Фракциянын да жыйынын өткөрөйүн деп турам. Айтор, бул иштин аягына чыгарабыз.
