Эльдар Сулайманов: “Урматтуу Садыр Нургожоевичке кайрылып, элдин суранычын жеткирдим”
-- Эльдар мырза, Чоң-Алай районуна өзгөчө макам берүү боюнча кайрылуу жасадыңыз. Бул сунушуңузду эмне менен негиздейсиз?
-- Өзүңүздөргө белгилүү болгондой, тажиктер Баткенге гана эмес, Чоң-Алай районуна да кол салышты. Эки-үч айылдын калкын эвакуациялоого туура келди. Мындай көрүнүш биринчи жолу болуп жаткан жери жок. Ошондуктан, Чоң-Алай эли районго өзгөчө макам берүүнү көптөн бери суранып келатышат. Ошондон улам мен президентибиз, урматтуу Садыр Нургожоевичке кайрылып, элдин суранычын жеткирдим. Өзү көңүл буруп, Чоң-Алайга өзгөчө макам берүү маселесин чечип берсе, элдин турмушуна жеңилдик болор беле? Үмүт бар.
-- Депутаттар кан берүү борборуна өздөрү бара коюшпай, Акүйгө чакырткандары эл арасында талкуу жаратты. Сиз буга кандай карайсыз?
-- Ал күнү мен түштүктө болчумун. Эми ар кандай кырдаал болуп калат да. Жетимиш адамды алып баргандан көрө, эки-үч адам келип алганы ыңгайлуу болдубу (?) деп ойлойм. Билбейм... Бул боюнча комментарий деле бере албайм.
-- Чакыргандары мейли, бирок пиар кылбай коюшса болот беле?
-- Албетте, жөнөкөй убакыт болсо буга эч ким деле көңүл бурбайт эле. Бирок, мындай убакта эл кичине туура эмес көрүп калды. Менин оюмча, бул жерде депутаттардын деле күнөөсү жок. Иш-чараны чагылдыруудан кетип калды окшойт...
"Азия Ньюс" гезити
