Расул ТҮЛЕЕВ: “Биздин соттордун ар кандай чечим чыгарганы таңгалдырбай деле калды”
Кыргызстандын эл аралык университетинин ага окутуучусу менен маек.-- Кулматов 5 миллион сом айып пул менен абактан бошотулду. Бул негизи кандай кадам? Башка айыпталуучуларды кандай тагдыр күтөөр экен?
-- Негизи, биздин соттор ар кандай чечимдерди чыгарып койгону бизди таңгалдырбай деле калды. Көп жылдан бери биздин саясатчылар “сот системасын реформалоо керек” деп келип, өздөрү бийликке келгенден кийин эле айткан сөздөрүн унутуп калышат. Кубанычбек Кулматовдун бошотулушу жөнүндө айтсак, ал жакта түшүнүксүз чечим болду. Анткени, кээ бир паракорчулукка шектелген саясатчылар 15 жылга соттолот, кээ бирин акча айып салып эле чыгарышат. Бул – бизде мыйзам элдин баарына тең эмес экенин билдирет да. Кулматов көп нерсени билет жана аны камакка алганы, менимче, саясый буюртма болчу. Анткени, учурдагы башка саясатчылар, жетекчилер паракорчулукка шектелсе дагы, эч кандай укуктук чаралар көрүлбөй келүүдө. Дагы бир нерсе, бул жакта көмүскө сүйлөшүүлөр болгондой. Балким, Кулматов соттор менен бир келишимге келди, ошондуктан бошотулуп калгандыр... Ал эми бул соттук чечим башка чечимдер менен карама-каршы келгендиги, дагы бир жолу бизде тандалма саясат жүрүп жатканын далилдеп турат.
"Азия Ньюс" гезити
