Азамат Токтоналиев моралдык жактан өзүн ыңгайсыз сездиби? Адам өлүп жатса...
Бул жашоодо өмүр баарынан кымбат. Бирок, акылга сыйбаган көрүнүштөр, өкүмзордук менен жантаслимге алып баруу өтө одоночулук. Кылмышкерлер эмес, укук коргоо кызматкерлери жоготууларга барып жатышканы өкүнүчтүү.
Бишкек ШИИБ башчысы Азамат Токтоналиевдин жетекчилигинин астында ар кандай акылга сыйбаган көрүнүштөр орун алууда. Жакында оорукчан жаранды милиция кызматкерлери басып алышып, демин кыстырып өлтүрүп коюшту. Жалгыз адамды үч-төртөө жаткызып алышып, ныгырып жатышса кантип жан бербесин? Ал чырылдап жансоога сурап жатса да угушпайт... Мындай аянычтуу көрүнүшкө Азамат Токтоналиев моралдык жактан өзүн ыңгайсыз сездиби? Же адам өлүмүн чымындыкындай да көрбөй калышканбы?
Бишкек ШИИБнин өздүк курамынан пара алууга айыпталып милиция кызматкерлери байма-бай колго түшүүдө. Бул жагы көнүмүшкө айланып бараткандай. Негизи “Хасбик” сын-пикирден сабак алып, алгылыктуу иштегенге бара албайт экен. Колунан келбесе кетпейби? ИИМге сөз тийгизип, көлөкө түшүрүп атпайбы!
"Азия Ньюс" гезити
