Чынара Жакыпбекова: “Курсан Асановдон өч алуу үчүн камап коюшкандай...”
Генерал Курсан Асановдун жактоочусу Чынара Жакыпбекова айым менен чакан маек курдук.
-- Чынара айым, генерал Курсан Асановдун соттук териштирүү иштери кантип атат?
-- Азырынча тергөө иштери токтоп турат. Бул кезге чейин ИИМдин убактылуу кармоочу жайында эле. Жакында эле УКМКга которушту. Ошол эле учурда бир кызык жагдайды айта кетүүм керек. Өткөн жылдын 5-9-октябрь күндөрү саясый лидерлерден кимдер гана өзүнө жоопкерчиликтүү милдетти жүктөшүп, мамлекетке тийешелүү ишканаларга барышып, элдин, коомчулуктун ишениминде жетекчилик кызмат өтөөсүн баштабаган? Алсак, Өмүрбек Суваналиев, Сыймык Жапыкеев жана башкалар. Негедир “бузук мыйзам” жалгыз Курсан Асановго гана иштеп атканы бир топ күмөн жаратууда. Бу жерде жеке кызыкчылыктар, жеке өч алуу жагы бардай туюлууда. Баары түшүнүксүз...
-- А Курсан Асановдун келинчегинин ал-жайы кандай, инсульт илдетине кабылып, ооруканда эле?
-- Ооба, сиз билгендей, ал киши инсульт илдетине кабылды. Төшөктөн турганга болбойт, туруп басып кетүү жагын айтпай эле коёлу, али эрте. Бүгүн эле акырындап, тил учунан кыбырап сүйлөй баштады. “Абалы жакшы” дегенден алысмын, өтө оор.
Сурат Жылкычиев
"Азия Ньюс" гезити
