Азимбек Бекназаров: “Жаңы депутаттар өлкөнүн байлыгын, бийлигин кайрадан бөлүштүрүшөт”
Малайзиядагы элчибиз Азимбек Бекназаров “Назар ньюс” сайтына маек берип, коррупция тууралуу төмөндөгүдөй пикирин билдирди.
“Кыргызстанда коррупция токтобойт, улам жаңы шайлоодо жаңыланып, жаңы партиялар аркылуу сырткы жүзүн өзгөртүп жашай берет. Акыркы төрт президенттер өз ишин «коррупция менен күрөшүүдөн» башташкан. Анын экөө: Бакиев менен Атамбаев ошол эле коррупциянын курмандыгы болушту. Азыркы президентибиздин «коррупция менен күрөшүп жатканына» үч жыл толот. Мына өзү мойнуна алып жатат, «коррупция токтобой жатат» деп. Кен байлыктардагы коррупция дың бойдон турат. Жөн эле чогулуштан чогулушка чейин айтып койбой, коррупциянын тамырына балта чабуунун, жетүүнүн, аны кыркуунун жолун издөө керек. Үч-төрт чиновникти камоо менен же алардан акча өндүрүү менен коррупция токтобойт. Кыргызстандагы коррупция бул бир эле пара алуу, же кызмат абалынан аша чабуу, пайдалануу, мамлекеттик каражатты уурдоо эле эмес. Бул тамыры бүткүл өлкөнүн жашоосун камтыган, анын саясый системасында жашаган, коомубузду бекем чырмап алган коронавирустай улам-улам кайталанып туруучу айыкпас социалдык оору. Мына, жакында жаңы депутаттар келишет. Бүткүл бийликти, байлыкты башынан кайра бөлүштүрөт”.
