Тажикстанда кыргыз-тажик чек арасы боюнча сүйлөшүү болду
14-ноябрда Тажикстандын борбору Дүйшөмбү шаарында кыргыз-тажик чек арасы боюнча өкмөттөр аралык делегациянын биргелешкен отуруму болду.Жыйынга Кыргызстандын улуттук коопсуздук боюнча мамлекеттик комитетинин (УКМК) төрагасы Камчыбек Ташиев жана Тажикстандын УКМКнын төрагасы Саймумин Ятимов катышты.
Натыйжада тийешелүү протоколго кол коюлду. Бул тууралуу Тажикстандын мамлекеттик "Ховар" агенттиги маалымдады. Кол коюлган документтердин мазмуну ачыкталган жок. Маалыматка ылайык, жолугушуу достук жана өз ара түшүнүшүү маанайында өткөнү, өкмөттөр аралык комиссиянын кезектеги жыйыны Кыргызстанда болору кабарланды. Жолугушуу тууралуу Кыргызстандын расмий органдары маалымат бере элек.
Кыргыз-тажик чек арасынын узундугу 972 чакырымды түзөт. Анын 300 чакырымдан ашыгы тактала элек. Андан улам эки өлкө ортосунда жаңжал чыгып келген. Акыркы 14-17-сентябрдагы жаңжал эң масштабдуу болуп, ондогон адамдын өмүрүн алды.
