Мугалимдерден башка коррупциянын “кит”, “акулалары” жоопко тартылса...
“Мыйзамсыз баюу” беренеси менен атактуу №61 мектептин диретору Ю.Низовский кармалды. Негизи Бишкектин баардык эле мектептеринин директорлору коррупцияга аралашкан. Себеби, 900 окуучуга эсептелген мектептерде 3000 бала окуса, орун жок болсо, эне-аталар балдарын киргизиш үчүн директорлорго тапкан ташыганын берип жатышат да. Мектеп фонддору жоюлган жок, демек, мындан ары да мыйзамдуу түрдө коррупцияга жол ачкан уюм катары санала берет.
УКМК коррупцияга каршы күрөшүп жатканы жакшы, бирок ошол “жегичтердин” эң алсызы мугалимдерге эле асылбай, “кит”, “акулалар” катары эсептелген сот, прокуратура, бажы, салык, энергетика, транспорт тармагындагы мыйзамсыз байыган эргулдарды да тайраңдатпай көзөмөл кылса, туура болот. Бир директордун эки-үч үйү болсо болгондур, ал эми бажычылардын, салыкчылардын, сот, прокурорлордун хансарайларын каякка жашырабыз?..
"Азия Ньюс" гезити
