Сокени резиденциядан чыгарабы?
Учурдагы мамлекеттик деңгээлдеги негизги көйгөйлөрдү алсак, түптүз эле Сооронбай Жээнбековго барып такалат. Алмазбек Атамбаевден өч алуу үчүн камап, ишти татаалдаштырганы анык. Бул маселе бүгүн да чечилбей, балээ жаратканы калдыбы? Кой-Таш окуясы жара катары шишип турат... Дегеле Сокенин үч жылдык башкаруусу чечкинсиздик менен коштолуп, иштебей жатып алганы үчүн мамлекеттин баардык тармактарын “шалга” айландырганы, анын кесепеттеринен көтөрүлүү кыйын болуп, кымбатчылыктын капшабы азыр да байкалууда. Пандемия учурунда митинг, пикеттерден коркуп, улам эле карантинге жаап атып, бизнес чөйрөсүнө кедерин тийгизгени белгилүү. Элибизди кырдырып жибергени өзүнчө сөз... Казынаны какшытып кете берсе суроо-сопкут жокпу? Октябрь окуясы боюнча да жоопкерчиликке тартылбаганы көпчүлүктүн маанайын бузуп келет. Чүй облусундагы ондогон гектар жерлери, мал чарбасы, кымырган байлыктары чекесинен чыгууда. Эми уялбай резиденцияда чалкалап жатат. Мөөнөтүнүн аягына жетпей эле экс-президент статусун минип алды. Соңку убакта жогорку лөктөр да ачууланып, Сокенин айынан бийликке көлөкө түшүп атканы талкууланып, аны резиденциядан чыгаруу жагы козголгону ыраспы?
"Азия Ньюс" гезити
