Коронавирус коркунучу: Касымалиева менен Дүйшалиев шек жаратты
Жогорку Кеңештин депутаттары Абдыбек Дүйшалиев менен Аида Касымалиева 14 күндүк карантинге алынды. Бирок алар карантинди үйүндө өткөрүшөт. Бул тууралуу депутат Аида Касымалиева “Кактус.Медиа” маалымат сайтына билдирген.
Маалыматтарга ылайык, депутаттар Германияда иш сапары менен болуп келишкен. Жаңы алгоритмге ылайык, аталган өлкөдөн келген жарандар 14 күндүк карантинде болушу шарт.
“Бизди Германиядан коронавируска текшеришти. Стамбулдан текшеришкен жок. Белгилеп кетиш керек, Кыргызстанда коронавируска абдан дыкат текшеришти. Азыр өзүмдү жакшы сезип жатам. Үйдөн иштейм,” – деп билдирген Аида Касымалиева.
Ал арада, соцтармактарда карантинге үйгө чыгарууга болобу, жөнөкөй жарандар карантинди ооруканадан өтөт, булар үйүндө, кош стандарттуулук (!) деп сын айткандар да болууда. Анан калса, Европа өлкөлөрүндө коронавирус жайылып атканын билип турушуп, айланганы барышабы?..