Адылбек Касымалиев “саякатчы бакадан” бешбетер улам бир өлкөнү кыдырууда
Акыркы убакта өкмөт башчы Адылбек Касымалиев “саякатчы бакадан” бешбетер улам бир өлкөнү кыдырып, расмий сапарлардын катыгын берүүдө. Эгерде Кыргызстан үчүн пайдалуу иштерди жасап жатса мактоого арзыйт, балким жөн эле учуп жүрсө, аба майданына миллиондорду коротуп жатса, анда айла жок. Мурдагы көп премьерлердин кетирген катачылыктары катары бааланат. Эң кызыгы, Адылбек Касымалиев аткаруу бийлигинде президенттен кийинки экинчи фигура. Бирок анын орду жоктой сыпатталып атат го? Мисалы, пиар кампаниясы деле ойдогудай эмес, эмне иштерди бүтүрүп жатканы боюнча деле толук кандуу маалыматтар берилбегени кандай? Бул киши саясый амбициясыз, “кол бала” сыңарындай буйрукту жасайт, элпек. Мындайча айтканда, “кой оозунан чөп албаган” жарыктык киши... Кандай болгон күндө да, өкмөт башчылык ордун сыйлап, жасаган жумуштары боюнча кол астындагылары реалдуу маалыматтарды берип коюшпаганы да таңгалдырат. Эл, коомчулук Адылбек Касымалиевдин ишмердигин билгиси келет эмеспи. Өзүн баркташпаса да кызматын баалап, басмырлабай көтөрмөлөп коюшса не?..
"Азия Ньюс" гезити
