Ырчыларга “чокморун” көтөрө чуркаган дааватчы Нуржигит Кадырбеков
Анча-мынча ыр жазган, чочугансып проза жазган, куру чечен, дааватчы, айтор, “универсал” деген атка конгон маданият министри Нуржигит Кадырбеков “расмий иш-чараларга келбеген ырчыларга чара көрүш керек” деген чечим кабыл алыптыр. Шашылыш дайындалган министр иштин көзүн билбей турганы, маданият жана искусствону түшүнбөгөнү ушундан ачык көрүнүп калды. Болбосо коммунисттик режимдин башкаруу ыкмаларын колдонуп, ырчыларга “чокморун” көтөрө чуркап, чочоңдобойт эле да. Ырчыларга маяна берип багып жатпаса, алар Нуржигит Кадырбековго көз каранды беле? Куру дымак күткөн министрдин маданият тармагын өнүктүрүү боюнча реалдуу программасы деле жок экен. “Күнүмдүк иштер менен алек болуп, келген кишилерди кабыл алып, телефон чалууларга жооп берип, дежурныйга окшоп, кылар иши жок эле отурат” дешти.
Өзү маданият тармагынын кишиси болбосо, маданият жана искусствону ичинен билбесе, “балеттин ырчылары” деп жүрсө, бул тармакты өнүктүрүү боюнча анда кайдан идея болот? Ал кантип маданият тармагы үчүн күйөт? Ушундай адашып жүргөн кадрлар маданияттын түбүнө жетмей болду.