Жакын тууганына 26 ирет бычак сайып өлтүргөн адамга өкүм чыкты
Токтогул райондук соту киши өлтүрүүгө айыпталып жаткан М.А.ны 15 жылга эркинен ажыратты. Бул тууралуу сот өкүмүндө маалымдалат.
Белгилүү болгондой, 2020-жылдын январь айында М.А. тууганына 26 бычак жолу сайып, кийин таксиге түшүп, кылмыш болгон жерден качып кеткен. Сот жараяны учурунда айыпталуучу күнөөсүн жарым-жартылай мойнуна алган. Анын айтымында, ал мал базарында бир тууганы менен жолугуп, чогуу арак ичип, таксиге отурган. Үйгө бара жатып, жолдун боюна токтоп, спирт ичимдиктерин ичип, балалык кезин эстей башташкан.
“Бир маалда, тууганы М.А.дан кынтык таап, алардын ортосунда мушташ келип чыккан. Ошол тапта чөнтөгүнөн бычак түшүп калганын көргөн, М.А. аны менен тууганын сайып өлтүргөн. Андан кийин ал колун карга жууп, таксиге отуруп, үйүнө кетип калган” деп айтылат өкүмдө.
