Бишкек–Ош жолунда унаанын ичинен аял кишинин жансыз денеси табылды
Бул тууралуу облустук жол кыймылынын коопсуздугун камсыздоо бөлүмүнөн билдиришти. Билдирүүгө ылайык, 4-январь күнү саат 21:50 чамасында Ош ОИИБи боюнча жол кыймылынын коопсуздугун камсыздоо бөлүмүнүн жана ИИМдин “Шумкар” атайын багыттагы полкунун кызматкерлери Бишкек–Ош унаа жолунда кызмат өтөп турган учурда “Дэу-Тико” унаасынын айдоочусу келип токтоп, “арттагы унаанын ичинде айдоочу менен жүргүнчү урушуп жатат” деген кабарды айткан. Кызматкерлер унааны издеп барышканда, токтоп турган “Хюндай-Соната” унаасы ордунан жылып жөнөгөн. Унаанын артынан барып токтотуп текшерген учурда, машинанын ичинен аял кишинин жансыз денеси жаткандыгын байкап, кызматкерлер айдоочуну Кара-Суу РИИБине алып барышкан.
Териштирүүдө каза болгон аял Ош шаарынын 1991-жылы туулган тургуну, айдоочу Кара-Суу районунун 1983- жылы туулган М.А. аттуу тургуну экени такталган.
Учурда "адам өлтүрүү" фактысы боюнча иш козголуп, тийиштүү экспертизалар дайындалып, тергөө иштери жүргүзүлүүдө. Унаа атайын айып короо жайга токтотулуп, шектүү убактылуу кармоочу жайга киргизилген.
“Супер кж”
