Окуучу кыздардын мушташынан кийин мектеп директору жана 3 кызматкер иштен бошотулду
Бүгүн социалдык тармактарда талаадагы суу жээгинде топтошуп, мушташкан окуучу кыздардын видеосу тарап, коомчулукка тескери пикир жараткан эле.
Мушташкан окуучу кыздар Аксы районунун Жаңы-Жол айылындагы №10 Жоробек Мамытбеков атындагы мектептин 10-11-классынын окуучу кыздары болгон.
Бүгүн, 20-ноябрда өткөн чогулушка акимдин биринчи орун басары Т.Эмилбек уулу, социалдык маселелер боюнча орун басары Д.Абдылдаева, билим берүү бөлүмүнүн башчысы У.Зыябекова, райондук ички иштер бөлүмүнүн башчысы Ш.Тангиров, Жаңы-Жол айыл өкмөтүнүн башчысы Ж.Осмонова, окуучулар жана алардын ата-энелери катышты.
№ 10 Жоробек Мамытов атындагы мектептин директордун берген маалыматына караганда, 11-класстан 3 кыз, 10-класстан 1 кыз, 9-класстан 1 кыздын ортосундагы пикир келишпестиктен улам мушташ келип чыккан.
Учурда бул окуя боюнча ички иштер бөлүмү тарабынан иликтөө иштери жүргүзүлүп жатат. Мушташка аралашкан кыздардын эч кимиси оор жаракат алган эмес.
Жыйында Ж.Мамытбеков атындагы орто мектептин директору, директордун окуу-тарбия иштери боюнча орун басары, класстан жана мектептен тышкаркы иштердин уюштуруучусу, социалдык педагог кетирген кемчиликтеринин негизинде ээлеген кызматтарынан бошотулду.
Aryba.kg
