Эрнис Толтоев: “Ош облусу боюнча 350 үй-бүлө чакан ишкерликке багыт алат”
Президенттин Ош облусундагы ыйгарым укуктуу өкүлүнүн орун басары менен маек.
-- Эрнис мырза, облус боюнча колунда жок 350 үй-бүлөгө чакан бизнес уюштуруу үчүн 100 миң сомдон бергени жатыпсыздар. Жардам алчу талапкерлер кантип тандалат?
-- Ооба, бул иш-чара министрлер кабинетинин 2022-жылдын 15-июлундагы №385 токтомунун негизинде жүргүзүлүп жатат. Ар бир райондон чакан ишкерликти өнүктүрүүгө ынтызар үй-бүлөлөр тандалып алынат. Айыл өкмөттөрүндө, райондордо комиссиялар түзүлдү. Бул саамалыкка кызыккан үй-бүлөлөр чакан бизнес долбоорлорун даярдап, комиссияларга тапшырышат. Анан комиссия карап чыгып, макулдук берген долбоорлорго ар бир үй-бүлөгө 100 миң сомдон берилет. Облустагы жети райондун ар биринен 50дөн үй-бүлө тандалып алынат. Социалдык пособие алган үй-бүлө 100 миң сом менен чакан ишкерликке багыт алат. Токтомдо контракттын убактысы да белгиленген. Контракттын жыйынтыгы менен үй-бүлө киреше алып, социалдык жөлөк пул алуудан чыгарылат. Бүгүнкү күндө облус боюнча 16 жашка толо элек балдары бар 32 миңге жакын үй-бүлө жөлөк пул алууда.
-- Бул акчалар кайсы булактын эсебинен каржыланат?
-- Каржы маселеси министрлер кабинети тарабынын чечилген.
"Азия Ньюс" гезити
