Аккулу Бердиев, ЖК депутаты: “Жайлоолор эс алып, калыбына келип калды”
-- Аккулу Тагаевич, Алай, Чоң-Алай жергеси эзелтен бери эле өзүнүн төр жайлоолору менен белгилүү. Кыргыз-тажик чек ара маселеси чечилгенден кийин бизге дагы миң гектардан ашуун жайыт жерлер кошулду окшойт. Чоң-алайлык, ал жактын шартын жакшы билген депутат катары айтсаңыз, азыр жайыттар кандай пайдаланылып жатат?
-- Ооба, бизге Тажикстандан 1500 гектар жайыт жерлер өттү. Буюрса, апрелдин аягы, май айынын башынан баштап эл жайлоого көчүп чыгышат. Биринчи жолу ошол жаңы жерлерди да пайдаланып, малын жайышат. Ал аябай чөп жакшы өскөн, жылуу жер. Жерге-Талдын чек арасында жайгашкан. Ал жакка мурда мал чыккан эмес.
-- Бир кездерде малдын көптүгүнөн жайыттар деградацияланып кетти эле. Азыр калыбына келдиби?
-- Азыр жакшы, калыбына келип калды. Албетте, жылдан-жылга мал көбөйүп атат. Ошондуктан, мамлекет тарабынан илгерки Советтер союзунун ыкмасы боюнча жайлоолорду которуп, эс алдыруу боюнча программалар кабыл алынса керек. Бирок, азырынча андай курч стадияга жете элек.
Аттокур Жумаев
