Мамбет Мамакеевич өзүнүн талыкпаган эмгеги менен, кажыбас кайраты аркылуу Кыргыз Республикасынын сыйлыктырынын баарын алды, элибиздин сый-урматына ээ болду. Анын себеби, Мамбет Мамакеевич энесинин эмчегин эме электе, Умай энеси киндигин кесе электе, көзү ачылып бул дүйнөнү көрө электе, энесинин курсагынан түшө электе Кыдыр акенин батасын алган, Кудайымдын назары түшкөн, мээрими төгүлгөн. Ошондуктан Мамбет авамдын жанында ар дайым жандоочусу, сактоочусу пири коштоп жүрдү.

Мамбет Мамакеевич медицина тармагында өтө терең өчпөй турган из калтырды. Хирургдардын мектебинин мектебин жаратты. Кыргызстандагы хирургиянын деңгээлин өтө бийик көтөрдү, эл аралык деңгээлге кошту. Кыргызстанга хирургдардын үрөн-уругун септи, ал урук арифметикалык прогресс менен өсүп-өрчүп жатат. Өзүнүн жасаган операцияларынын саны 30 миң болсо, окуучулары жасаган операциялардын саны 300 миңден ашып кетти десем жаңылышпайм. Мамбет Мамакеевичтин жетекчилиги менен 22 докторлук, 43 кандидаттык диссертация корголду, алардын дагы окуучулары илимдин доктору, кандидаты болушту.

Мамбет Мамакеевич – Кыргызстан боюнча жалгыз Гиннестин китебине кошулган, республика боюнча бирден-бир Манастын үч орденинин ээси, анан Кыргыз Республикасынын Баатыры, Кыргызстан боюнча жалгыз “Улукман” деген атка конду, өлкөбүздөгү Ысык-Көлдүн дагы бир абройлуу акеси дегенге татыктуу.

Биз, хирургдар, Мамбет Мамакеевичти жүз жашка чыгарабыз деп максат койдук эле, ошону кааладык эле. Биз айттык эле “сиз жүзгө чыксаңыз, биз сизди Мамбет дебей “Кылымбек” деп атап жүрөлү” дедик эле. Биз ошентип “Кылымбек” дей албай калдык, Мамбет деген өзүңүздүн нукура атыңыз менен о дүйнөгө кете бердиңиз. О Мамбет ава, жүзгө чыкпай эмне мынча шаштыңыз?!

Жашап жүргөн ак сарайды

Тар чалдыбар дедиңби?

Кире турган мүрзөңдү боз сарайым дедиңби?

Жакасы жок, жеңи жок

Ак кепинди кийгим келди дедиңби?

Чырагы жок, шамы жок

Капкара үңкүргө киргим келди дедиңби?

Кудайымдын илимин

Билгим келди дедиңби?

Чын дүйнөнүн мүрөгүн

Ичким келди дедиңби?

О турмуштун кызыгын