Жакырчылыктын сазына батып баратабыз. Чыдайбызбы?
Пандемияга, бийлик алмашуусуна, дагы башка шылтоолорго таянып, өзүбүздү өзүбүз алдап жашап келе жатабыз. Жыл санап өлкөбүздүн экономикасы төмөндөгөнү төмөндөп баратат. Төмөндөгү чыныгы статистикага үңүлсөк дагы маанай түшөт.
Дүйнөлүк банктын эсеби боюнча, Кыргызстанда 2020-жылы экономика 8,6% ылдыйлады. Сомдун АКШ долларына карата курсу 19% төмөндөдү. Бул тууралуу Дүйнөлүк банктын Кыргызстандагы кеңсесинин башчысы Навид Хасан Накви медиа каражаттарынын өкүлдөрү менен жолуккан учурда айтты.
2019-жылы болжол менен калктын 20%ы жакырчылыктын жеткен чегинде жашаса, 2020-жылы бул көрсөткүч 31%га жетти, 2021-жылы дагы 35% болору күтүлүүдө.
Мындай кейиштүү абалды Хасан Накви эки себеп менен түшүндүрдү. Биринчиси – киреше булактарынын жоголушу жана инфляция, экинчиси – 2020-жылы азык-түлүк баасынын 12%га жогорулашы.
Дүйнөлүк банк COVID-19 пандемиясынын кесепеттерин жоюу үчүн Кыргызстанга жардам иретинде 160,15 млн. доллар бөлгөн. Анын 22,15 миллион доллары медицинага, 138 миллиону калктын аз камсыздалган катмарына жардам катары жана пандемияда жабыр тарткан орто, чакан бизнеске берилген.
“Азия Ньюс” гезити
